જો તમે પહેલા ઈશ્વરનું રાજ્ય શોધો છો અને જો તમે એકલા ઈશ્વરને પ્રસન્ન કરવા માંગતા હો, તો કોઈપણ બાબત ઈશ્વરની ઇચ્છાને તમારા જીવનમાં પરિપૂર્ણ થતાં રોકી શકતી નથી - દરેક વિગતમાં - કારણ કે પૃથ્વી પરની બધી સત્તા આપણા ઈશ્વરના હાથમાં છે.

ઈસુએ પિલાત સમક્ષ બે મહત્વપૂર્ણ નિવેદનો આપ્યા:

(1) "મારું રાજ્ય આ જગતનું નથી અને તેથી હું પૃથ્વીની બાબતો માટે લડતો નથી" (યોહાન 18:36).
(2) "મારા પિતા તમને મારા પર અધિકાર ન આપે તે સિવાય તમે મારા પર કોઈ સત્તા ધરાવી શકતા નથી" (યોહાન 19:11).

આ બેવડી કબૂલાત છે કે જેના વિશે પાઉલે તિમોથીને ઈશ્વર માટે સારા સાક્ષી બનવા કહ્યું ત્યારે તેણે તિમોથીને યાદ અપાવ્યું હતું (તિમોથીને પહેલો પત્ર 6:13,14).

મુશ્કેલ પરિસ્થિતિઓ અને મુશ્કેલ લોકોનો સામનો કરતી વખતે, મેં પણ ઈશ્વર અને શેતાન અને લોકો સમક્ષ આ કબૂલાત કરી છે.

જો તમારી પાસે તમારા જીવનમાં કોઈ મૂર્તિ ન હોય તો જ તમે હંમેશા આરામથી રહી શકો છો. સારી નોકરીઓ, ઘરો અને દુનિયાની સુવિધાઓ, ઘણા ખ્રિસ્તીઓ માટે મૂર્તિઓ બની ગયા છે. લાકડા અથવા પથ્થરની મૂર્તિની પૂજા કરવા કરતાં તે વિશેષ સારું નથી! પરંતુ ઘણા ખ્રિસ્તીઓને આ ખ્યાલ નથી. ઈશ્વર જે આત્મિક ભેટો આપે છે (જેમ કે સેવાકાર્ય) પણ મૂર્તિ બની શકે છે, જેમ ઇબ્રાહિમ માટે ઈસહાક હતો. જ્યારે એકલા ઈશ્વર જ આપણા માટે સર્વસ્વ છે અને જો આપણે આપણા હૃદયથી ઈશ્વરને સાચા અર્થમાં કહી શકીએ કે, "પ્રભુ, તમારા સિવાય પૃથ્વી પર હું કંઈ જ અને કોઈને પણ ઈચ્છતો નથી" (ગીતશાસ્ત્ર 73:25), તો જ આપણે કહી શકીએ છીએ કે આપણે મૂર્તિપૂજાથી મુક્ત છીએ અને ઈશ્વરની આરાધના કરવાનું શરૂ કરી શકીએ છીએ. હું પ્રાર્થના કરું છું કે તમે બધા દરેક મૂર્તિમાંથી મુક્ત થાઓ અને એકલા ઈશ્વરનું ભજન કરો.

આપણો ભરોસો અને વિશ્વાસ હંમેશા એકલા ઈશ્વરમાં જ હોવો જોઈએ - અને ક્યારેય માણસોમાં નહીં, રખે ને યર્મિયા 17:5, 6 માં ઉલ્લેખિત શાપ આપણને સુકવી નાખે છે: "યહોવા કહે છે, “જે પુરુષ મનુષ્ય પર ભરોસો રાખે છે, ને મનુષ્યના બળ પર આધાર રાખે છે, ને યહોવા તરફથી જેનું હ્રદય ફરી જાય છે, તે શાપિત છે. તે રણમાંની બોરડી જેવો થશે, ને હિત થશે ત્યારે તે તેના જોવામાં આવશે નહિ. તે અરણ્યમાંની સૂકી જગાઓમાં, ખારવાળા તથા વસતિહીન દેશમાં વાસો કરશે.”

આપણી સાચી સંપત્તિ પૈસા કે મિલકતથી ગણવાની નથી, પરંતુ નિષ્ફળતાઓ અને ઊંડી કસોટીઓમાંથી મળેલા પ્રભુના જ્ઞાનમાં છે. યર્મિયા 9:23, 24 આ રીતે લખેલું છે: યહોવા કહે છે, “જ્ઞાની પોતાના જ્ઞાન વિષે અભિમાન ન કરે, તેમ જ બળવાન પોતાના બળ વિષે અભિમાન ન કરે. વળી ધનવાન પોતાના ધન વિષે અભિમાન ન કરે. પણ જે કોઈ અભિમાન કરે તે આ વિષે અભિમાન કરે કે, તે સમજીને મને ઓળખે છે કે, હું પૃથ્વી પર દયા, ન્યાય તથા નીતિ કરનાર યહોવા છું; કેમ કે તેઓમાં મારો આનંદ છે, ” એમ યહોવા કહે છે.

આ એકમાત્ર બાબત છે જેનું આખરે મૂલ્ય છે. જગતની દરેક સિદ્ધિઓ તેની સરખામણીમાં કચરો છે. જેટલું જલ્દી આપણે એ સત્ય જાણીશું, તેટલા જ આપણે જ્ઞાની બનીશું.